Duerch de Kapp

Category: Politik

  • Mäi léifste Subkontinent

    Europäesch Industrie am Musée, europäesch Militärbauten an der Karibik a chinesesch Schnellzich duerch Afrika (Kenya): déi nei Zäit

    Bei den originale Post
    English
    Deutsch
    Español
    Français

    Ech si vill duerch Europa gereest a konnt mech vu senger Schéinheet, senger vergaangener Gréisst a senger onwarscheinlecher Verschiddenheet iwwerzeegen. Ee grousse Moment an e groussen Aha fir mech war am Fréijoer 2001. Ech si mam Zuch duerch Wales gefuer an hunn do eng vereelste Schmelzelandschaft schaffe gesinn, wéi ech si schonn 30 Joer laang zu Lëtzebuerg net méi gewinnt war. Eisen europäesche Räichtum war d’Industrie, déi sech esou séier verännert huet (an därer hir Ufäng an England an an Däitschland mat gestuelenem Gold aus Amerika finanzéiert gi sinn). 1

    Ech si grouss ginn am feste Glaf, an der beschter vun alle Géigenden ze liewen, um Nuebel vun der Welt. E Bléck an all Atlas huet mer bewisen, datt et esou war. 2Do war Europa: am Zentrum vun der Welt. Waren net d’USA, war net Australien an e bëssen esouguer Indien e Stéck Europa? An dat verzweifelt a batteraarmt Afrika huet d’Europäesch Unioun nogemaach mat der UA fir iergendwéi aus sengem Misär erauszekommen. Alles war gutt.

    Natierlech war ech och an net europäesche Kulturen op Besuch. Och do waren Zeien ze gesi vun der mënschlecher Kreativitéit, vun Erfindungsräichtum, vu Muecht a vun enger immenser Intelligenz. Mee bis an d’Dominikanesch Republik waren déi kleng spatz Tiirmecher, déi ee bei eis iwwert der Uelzecht gesäit, oder aner Symboler als Zeeche vun europäescher Iwwermuecht. Eis Feinden, alles Barbaren: Hunnen, déi hiert Fleesch ënnert dem Suedel gekacht hunn, Ottomanen, déi just gutt ware fir an zwee gespléckt ze ginn, Indianer, déi gedanzt hu fir Reen ze kréien, a (méi rezent) Russen, Baueren, déi mat Superkaddoe (Grünes Gewölbe) probéiert hunn, Aristokraten ze ginn, ier se mam Kommunismus hir Baueren erhingere gelooss hunn. Dat Weltbild hunn ech geléiert.

    Virun zwee Joer huet Peru mech geschockt. Geothermesch Agrikulturlaboën, Tempelen ouni Mënschenaffer a Machu Pichu hu mech vun der Europa-Vue definitiv geheelt. En héich kultivéiert Indio-Räich, wat e puer spuenesch Banditten a kuerzer Zäit ruinéiert haten. A wat an der europäescher Weltsiicht, anescht wéi China oder Japan, wierklech nëmmen nach eng Foussnout ass. Scho virdrun hat ech am Luxemburger Wort e Leitartikel geschriwwen. Wann ee vu San Franzisko géing iwwert de Pazifik kucken, wär Europa ganz wäit ewech, stoung dodran. Datt déi europazentréiert Weltkaart e politescht Muechtinstrument war, wat d’Gréisst vun de Länner, hir Demographie an hir Buedemschätz falsch erëm géing spigelen, ass ëmmer méi kloer ginn. Wann Indien en asiatesche Subkontinent ass, ass Europa kaum méi.

    Iwwerschätzung a falsch Aschätzung sinn als temporären Iertum ze verkraften a kënne korrigéiert ginn. Wéi e Mënsch kann e Land sech un nei Muechtverhältnisser gewinnen. Virun e puer Méint huet e Bliederen duerch dem gudden alen Huntington säi berüümte Bestseller mer eppes virun Ae gehalen: Buchstieflech all Warnung vun deem unerkannten Auteur gëtt vun der heideger EU mat zween Ae fest zougepëtzt ignoréiert. 3 D’europäescht Optrieden an der Welt geschitt mat enger Iwwerhieflechkeet wéi wann d’europäesch Weltkaart Realitéit wär. Mär Europäer raschten op eisem (industriellem) Räichtum, erfannen ëmmer nei Weeër fir der Industrie d’Existenz sauer ze maachen an erklären der Welt, wéi si hir Ressourcen ze schounen hätt. Iwwerdeems kommen a China an an Indien all Joer dräi Milliounen Ingenieuren aus de Schoulen an an internationale Statistiken, tauchen europäesch Ingenieure an der Ausbildung scho guer net méi a relevanten Zuelen op. 4 Mär bilde léiwer Spezialisten a Genderstudien aus. Esou wéi mer fréier Glaspärelen un d’Urbewunner verdeelt hunn, komme mer haut mat EU-blo-wäisse Plastiksbarriären, fir datt keen Offall an d’Mier geréit. An da wonnere mer eis, datt China, dat iwwerdeems an dëse Länner Autobunnen an Zuchstrecke baut, d’Konzessioune krit fir déi seelen Äerden, déi mär bluttnéideg géinge brauchen, a sief et nëmme fir eisen Elektrifizéierungswansinn iergendwéi realistesch wierken ze loossen.

    [i]

    [ii] Top 10 Countries Producing the Most Engineers in 2025 [Google hëlleft]

    Europa weess schonn iwwer 50 Joer laang, datt d’Gebuerten an eiser Géigend net duergi fir de Bedarf un Aarbechtskraaft, deen de Wirtschaftswuesstem eis bréngt, ze decken. Duerfir ( an net aus engem Gefill vu Gläichberechtegung) hu mer ëmmer méi vun eiser weiblecher Bevëlkerung schaffe geschéckt a betreien de Nowuess elo mat enger neier Industrie (Crèchen, Préscolaire a Schoul), déi eis an engems erlaabt, d’Kanner fréi ze beaflossen an ze kontrolléieren. Manner Kanner a Migratioun sinn eis Äntwerten op eng Demographie, déi eise Wuelstand net méi garantéiere kann. Koppelen hëllefen, méi Kanner an d’Welt ze setzen, gëtt an de 1970er Jore, wéi de Problem erkannt gouf, als “Lapinismus” an Agrëff an d’Privatsphär verdäiwelt, awer d’Leit fir vegaant Iessen begeeschteren, fir de Klima ze retten, ass ok! (Ech muss selwer laachen, datt de Kanengechersvirworf fir déi zwee Fäll ka verstan ginn, léif Frënn vun der Wuerzel.)

    E gudden Deel vun der europäescher Groussaartegkeet war ab dem 15. Joerhonnert och a virun allem op militäresch Muecht zeréckzeféieren. Nom Zweete Weltkrich awer besonnesch nom Kale Krich huet Europa decidéiert, vum grousse Brudder Amerika ze profitéieren an huet säi Militär verkomme gelooss. Maassgeeblech doru bedeelegt war iwwregens eng gewësse Madamm von der Leyen, deemols däitsch Verdeedegungsministerin. Haut wëllt déi Damm Europa an e Krich mat Russland féieren. D’Welt verännert sech rapid, an d’Länner musse flexibel op déi nei Uerdnunge reagéieren. Mee an der EU gëtt de Regulatiounskorseli ëmmer méi enk gestréckt, fir deene 27 Länner bis an d’Steierpolitik eran ëmmer manner Spillraum ze loossen. Mär Europäer hunn d’Klack net lauden héieren, a mer loossen déi Daf eis Zukunft bestëmmen.

    Et ass nëmmen eng Fro vun der Zäit, bis dee Räichtum, deen iwwer Joerhonnerten op Käschte vum Rescht vun der Welt ugeheeft ginn ass, net méi duergeet, fir de Liewensstandard, un dee mer eis gewinnt hunn, ze sécheren. De Mëttelstand spiert dat elo schonn, europawäit. Awer mer sinn als Mënschen a Wieler esou gefaang an eisem System, datt mer wéi den Hues virun der Schlaang op d’EU kucken an op e Wonner waarden. O-Toun Bréissel: “Mär brauche méi EU fir déi Zopp auszeläffen, déi d’EU eis gebratscht huet.” Wierklech? Wat gutt klappt? Ewéi Schamanen danzen eis Politiker elo fir de Klima ze retten. Allerdéngs mam nemmlechte Succès wéi déi al Naturvëlker.

    Europa haut ass e bëssen eppes wéi d’Pokalsammlung vu Schalke 04: Vill vergaange Gréisst, mee keng Kompetenz, keng Loscht a keng Wäitsiicht fir eng Verbesserung an der Tabell ze erhoffen. Europa mag am Kapp vu villen nach ëmmer de Nuebel vun der Welt sinn, mee dat ass no der Gebuert jo och en zimmlech iwwerflëssege Kierperdeel. A genee esou gi mär ëmmer méi vun ëmmer méi Länner gekuckt. Ouni Sympathie iwwregens, well ze laang ware mer de räichen, iwwerhiefleche Besserwisser, dee Monni, deen aneren mat engem veruechtende Grinse gesot huet, wéi domm a wéi schlecht an ondemokratesch si wären.

    Eng exzellent Lektür iwwert den europäesche Räichtum: Eduardo Galeano, “Les veines ouvertes de l’Amérique latine”.

    1. Eng exzellent Lektür iwwert den europäesche Räichtum: Eduardo Galeano, “Les veines ouvertes de l’Amérique latine”. ↩︎
    2. Hei ass e flott Geschier fir d’richteg Gréisst vu Länner ze vergläichen: This Map Tool Lets You See Just How Distorted the Mercator Projection Is [Google hëlleft] ↩︎
    3. Samuel P. Huntington, The Clash of Civilizations  ↩︎
    4. Top 10 Countries Producing the Most Engineers in 2025 [Google hëlleft] ↩︎

  • Gläich virum Gesetz

    Fir d’Gemidder e bëssen ze berouegen, wëll ech besonnesch den Dammen, déi dëst liesen, e puer schéi Blummen offréieren.

    Bei den originale Post
    English
    Deutsch
    Español
    Français

    Virsaz fir 2026: Ech gi keng Quotefra an och kee Quotemann! Mär verlafen eis, wa mer mengen, mer kéinte per Gesetz d’Ënnerscheeder tëscht de Mënsche verschwannen doen. A mär widderspriechen eis, wa mer an engems fir “Diversitéit” antrieden.

    Zwar hëlleft déi positiv Diskriminatioun (oder affirmativ Aktioun, wéi si och genannt ginn ass) vu soziale Gruppe punktuell, méi esou Leit ënnerzebréngen. Mee de Präis fir si selwer ass héich. Fir d’éischt ze nennen ass den Zweifel un der Kompetenz vun esou bevirdeelegte Persounen. Wa vun 100 Kandidaten der 25 mussen en zoufällegen, net u Kompetenze gebonnene  Krittär erfëllen, bleift dat net aus. An zwar bei alle Persoune vun deem Grupp, och wa si ni vun enger Mesür profitéiert hunn.. De Bevirdeelegten, dee vläicht exzellent Referenzen huet an en Ass op sengem Gebitt ass, weess net, ob dat him d’Plaz bruecht huet oder ob et dach vläicht seng Hautfaarf oder säi Geschlecht war. Säin Aarbechtskolleeg kuckt hie schif als een, deen de Job ergattert huet, ouni e Fanger kromm ze maachen. An eventuell Clienten kënne sech froen, ob si elo mat engem inkompetente Mataarbechter ofgespeist ginn.

    Dat dierft de Grond sinn, datt Afroamerikaner zu deene gréisste Kritiker vun engem System zielen, dee vu Wäisse (1961 vum John F. Kennedy) fir si erfonnt ginn ass. D’Fro sief erlaabt, ob et net déi profitabel Maschinerie, déi hei a Beweegung gesat ginn ass, war, déi vill vu soziale Spannunge geschaf huet. E gudden Deel, vun den Aussoe vum Charly Kirk, déi vu senge Géigner als Rassismus interpretéiert ginn, ass en Hannerfroe vun der Kompetenz vu Leit, déi hir Plaz net duerch hir berufflech Qualifikatioun kritt hunn. 2024 huet d’Iewescht Geriicht an den USA affirmativ Aktioun opgrond vun der Rass verbueden.

    Do ware Lëtzebuerg an d’EU grad monter derbäi, e puer Schëppe bäizegeheien, wat d’Bevirdeelegung vu Fraen an anere Gruppen ob Aarbechtsplazen ugeet. A well an Europa alles méi grouss, méi schéin a méi intelligent soll sinn, wéi an den USA, hu si Positioune viséiert, déi per se héchste Qualifikatioun verlaangen, politesch Mandater a Spëtzepositiounen an der Wirtschaft.

    Lëtzebuerg huet mat der Fërderung vu benodeelegte Gruppen (wéi Fraen an LGBQT, fir nëmmen déi ze nennen) esou richteg lassgeluecht, wéi déi zwou gréisste Stied vum Land Fraen als Buergermeeschter haten an d’Regierung vun engem Homosexuelle gefouert ginn ass. Wat natierlech d’Fro opwerft, ob mäi klengt Land esou Aktiounen iwwerhaapt néideg huet.

    D’Uni Lëtzebuerg huet op eemol véier leedend Fuerschungsplaze fir Frae reservéiert. D’Kandidatinne fir déi Poste wäerte gutt a gär 6 bis zéng Joer Unisstudium hannert sech hunn. Wa si duerno net kapabel sinn, sech an engem normale professionell-wëssenschaftleche Selektiounsverfaren géint männlech Kollegen duerchzesetzen, da si si kaum geeegent, e Fuerschungsdepartement an der haarder internationaler Fuerschungskompetitioun ze féieren. Dee Bonbon vum Rektorat ass fir dës Damme wuel éischter als Frechheet ze gesinn, deen hinnen eng effikass a leedend Aktivitéit wäert vill méi schwéier maachen.

    Kucke mer eist gutt aalt Vulleparlament och nach kuerz, dat zënter zwou Nationalwalen (2018) aus Quotelëschten zesummegesat gëtt. Abee 2023 sinn 18 Fraen an d’Chamber gewielt ginn, manner (!) ewéi 2018 (22). Dat seet wéineg iwwer hir Kompetenz, mee vill iwwert d’Akzeptanz vum Wieler.

    Iwwregens: Fir déi Frae-Quote bei Nationalwalen duerchzesetzen, gëtt e Gesetz mëssbraucht, dat d’Parteiefinanzéierung sollt fair reegelen. Fir kleng Parteie war déi Reegelung zwar ni wierklech fair, mee zousätzlech fäerte si elo finanziell Aboussen, wann net “genuch” Fraen op de Lëschte sinn. D’Gesetz, dat d’Onofhängegkeet vun de Parteie sollt garantéieren an duerfir och an der Chamber gestëmmt ginn ass, forcéiert dës elo, hir Kandidatelëschten, hir Visitekaart also, no Regierungswonsch ze gestalten.

    Kee streit d’Tatsaach of, datt iwwert de Weltglobus verdeelt ongeféier esou vill Frae wéi Männer liewen. Kee streit awer och d’Tatsaach of, dat méi wéi d’Hallschent vun de féirende Wirtschaftspositioune vu Männer besat sinn. Zwou Tatsaachen ouni iergendee Bezuch: Ass deen ee Fakt méi wäert ewéi deen aneren, esou datt een dëse misst änneren? A firwat gëtt d’Paritéit net och a Sportsekippe gefuerdert (wat op mannst am Fussball mat sengen 11 Spiller schwéier wär)? Oder bei den Enseignanten, wou Frae vun der Spillschoul bis Enn Sekondär eng grouss Majoritéit hunn. Ass an dësem liewenswichtege Feld, wou de Staat an der Verantwortung steet, keng Nohëllef fir e besseren Ekiliber vun de Geschlechter  néideg?

    Gläichzäiteg sech widderspriechend Fakten ze gleewen, nennt de George Orwell als een Zeeche vun Diktatur “Double Talk”. Wat anescht ass et, wa Fraen massiv d’Schoul an domat Kannerbetreiung an Erzéiung als Aarbechtsfeld wielen an domat déi Rolleverdeelung, déi d’Quotereegelung wëll opbriechen, bestätegen, an awer eventuell als Enseignant de Feminismus héichhalen?

    Et mécht mär Angscht, wéi Regierungen an net gewielten international Institutiounen ëmmer méi ongenéiert ideologesch an net steierlech motivéiert Reegelungen erfannen, déi Auswierkungen op d’Profitabilitéit vu Betriber kënnen hunn (bei manner qualifizéierte Quote-Salariéen) oder esouguer op eis Demokratie an op d’Onofhängegkeet vun eise Parteien. Am Numm vun enger Ideologie, déi emol net usazweis de Beweis erbruecht huet, datt paritätesch gefouert Betriiber oder e paritätescht Parlament wierklech besser géinge schaffen, jo dat emol net probéiert huet. Dat gëtt einfach behaapt an dierft och mat objektiver wëssenschaftlech fundéierter Statistik net ze beleeë sinn. Et gëtt kee Beweis, datt mer an engem Matriarchat manner Weltkricher gehat hätten.

    Natierlech kann ee bei engem gesellschaftleche Konsens fir gewësse Gruppen, déi als benodeelegt gesi ginn, ze hëllefen, vu staatlecher Säit agräifen. Mee ass eng phantasielos Quot net och en Aarmutszeugnis fir d’Politik? Fënnt déi näischt besseres, ewéi eng Lat ze leeën, déi just mat engem Krittär, deen och nach null Relevanz fir déi weider Aktivitéit huet, kann iwwerspronge ginn? Geziilt Fërderung geet anescht a fänkt wéi esou dacks an der Schoul un. An esou wéi een all Mëssstänn op der Welt an der Wirtschaft net de Männer soll ukreiden, wëlle mer dann der Schoul hirt Versoen aan déi allgemeng Nivelléierung no ënnen bei dëse gesellschaftlechen Themen net de Fraen ukreiden.

    Datt jidderee gläich ass virum Gesetz, ass eng generéis (wann och net wierklech realistesch Iddi. Si sollt net mat Moossname verwässert ginn, déi eenzel Gruppe méi gläich wéi anerer maachen.

  • B … new world

    • Name Shield
    • Loma Santa Isabel
    • San Felipe
    • Danzhal
    • Och San Felipe
    • Navidad

    Andréck vu Puerto Plata an der DomRep. Wéi versprach nerven ech net mat intellektuellen Illustratiounen zu abstrakten Iddien.

    Bei den originale Post
    Text in English
    Text auf Deutsch
    Texto español
    Texte français

    Eis ass vläicht de Kapp ze fréi zougewuess. Vläicht hänke mer awer och nach ëmmer un deem, wat sech als Mythologie festgesat huet: Rock ‘n’Roll, Mee 1968, Woodstock an Hippy-Kultur, Punk …

    Net, datt mer d’Onzoulänglechkeeten net gesinn: Mee zesumme mam Optimismus, der Opbrochstëmmung an der ganzer Kulturszen hat sech a menger Jugend wuel d’Hoffnung op eng déifgräifend Ännerung an der Welt gehalen. Wat soll ech soen: Ech ( a vill Kolleegen, mat deenen ech konnt schwätzen) verstinn d’Welt net méi. An dacks ass dat deen éischte Saz, deen ausgetosch gëtt, wann ee sech erëmgesäit.

    Mär liewen natierlech net an enger grousser Diktatur oder an enger Welt mat manner Méiglechkeete wéi viru 50 Joer. Mee mir gesi fir d’éischt offensichtlech Bestriewungen, fir Meenungen ze ënnerdrécken oder op mannst aus der ëffentlecher Diskussioun erauszehuelen. Fabuléieren, Zukunften entwerfen, spekuléieren, senger Phantasie fräie Laf loossen féiert haut an e reegelrecht Minnefeld. A séier lant een an der sozialer Veruechtung, der Exklusioun. Dat schéngt, onofhängeg dervun, ob ee Saache seet, déi kéinte stëmmen, d’Wonnerwaff ze sinn mat där déi ondisziplinéiert Mënscheband kann un d’Léngt geluecht ginn.

    Wat mech am meeschte schockéiert, ass, wat ech eng moralesch Ëmpolung nennen. Nieft dem Gulag an enger och deemols schon dacks iwwerdriwwe beschriwwe “rouder” Bedrohung, waren déi Haaptvirwërf, déi de sowjetesche System gemaach kritt huet, déi staatlech gefërdert Denunziatioun, dat Mësstrauen, dat tëschent Eltere a Kanner geséit gin ass, an d’Instrumentaliséierung vun der Psychiatrie als Ënnerdréckungsinstrument. Elementer, déi sech haut am demokratesche Westen ouni Hemmungen als berechtegt Uleies ëremfannen. Denunzéieren (bei der Poliss oder all selwer ernannter Internet-Poliss), fir verréckt erklären (Alu-Hut), de Kanner zum Affekot géint hir Elteren roden, all dat gëtt haut, keng 40 Joer duerno, ouni mat der Wimper ze zucken, gutt geheescht.

    Intressant ass awer och, datt am nemmlechten Otemzuch Methoden, déi de Westen am Kale Krich ganz transparent a mat engem gewësse Stolz géint de kommunistesche Block agesat huet, haut als kriminell an onzoulässeg duergestallt ginn. Sécher huet Russland, hunn Nordkorea, China an islamistesch Terrorgruppe séier a gutt verstanen, den Internet an d’sozial Medie fir hir Propaganda ze nëtzen. Genausou wéi de Weste viru 60 Joer a wärend dem ganze Kale Krich mat iwwerleeënen finanziellen an technesche Mëttelen den Ostblock mat prowestleche Medien (Radio Free Europe a vill anerer) iwwerschwemmt huet.

    Wien huet de Kale Krich gewonnen, wa sech haut d’Methode vun der UdSSR bei eis esou breet maachen, ouni datt (méi) een eppes derbäi fënnt?

    Dat ass fir en eenzelne Mënsch, dee bis Enn den 1980er Joren e ganz aneren Diskurs ze héire krut, vill ze verkraften. Et ass awer net alles, wat geännert huet. Wärend ee fréier mat Statistik beweise konnt, wat ee beweise wollt, sinn et haut Computermodeller, déi all Behaaptung kënne beleeën. De gudde Winston Churchill géing un dëse Superstatistike warscheinlech verzweifelen, well hien hät guer net d’Kenntnesser fir se selwer ze fälschen. Mee esou Modeller gi vu Mënsche gefiddert, déi wëssen, wat si gär ënnert dem Strich stoen hätten.

    Déi ëm sech gräifend Modelliséierung vun der Géigewaart an der Zukunft, ass och d’Basis vun engem gelungene Verständnis vu Wëssenschaft. Nei Technologien sinn an der Vergaangenheet agefouert ginn, wann hir Risiken akzeptabel waren, wat net geheescht huet, datt si null waren. Wann ech just den Thema Elektro kucken, setze mer haut op eng Technologie, déi net geséchert ass, an der Hoffnung, datt déi néideg Fortschrëtter (an der Batterie-Technologie) iergend eng Kéier wäerte kommen an datt eis Wiel dann och wirtschaftlech finanzéierbar ass. Dat ass Vabanque gespillt bei eppes existenziell Wichtegem wéi dem Stroum (an nëmme well verschidde Computermodeller eis eng Klimakris prophezeien).

    Vergläichbar als Risikotechnologie ass déi ëmmer méi grouss Laascht u Stralen, déi de Mënsch ze droen huet. Trotz dem Wëssen ëm Stralegeforen, ginn ongehemmt ëmmer nei Quellen a Betrib geholl. Wien no de Gefore freet, kritt gesot, déi wären nach net erfuerscht, ewéi wann déi Tatsaach eleng de Risiko géing aus der Welt schafen. An och bei der Nanotechnologie geet et esou. Trotz der Gefor vum Asbest, déi viru Jore kloer erkannt gouf, ginn ëmmer méi nei klengst Partikelen op eis Longe lass gelooss … bis eran an eis Zosen a Schéinheetscrèmen.

    E weidere Punkt, dee mer Schwieregkeete mécht, ass déi total Entprivatiséierung, där mer ausgesat sinn. Ech stinn natierlech zur Meenungsfräiheet a wëll och net, datt d’Entwécklung vum Internet an de soziale Medie beaflosst, gebremst, kontrolléiert oder verbuede soll ginn. All Mënsch huet hei eng Eegeverantwortung, wéi wäit hien dës Saachen a säi Liewen wëllt loossen, wéi wäit hie sech wëll beaflosse loossen a wéi hie mat deenen Outilen ëmgeet.

    Allerdéngs verléiere mer all eis Nüancen, wa mer déi Spillecher matspillen. An der Goat-Diskussioun am Fussball (wien ass de Greatest Of All Time?) hätt ech am private Gespréich mat engem Frënd ganz sécher ganz drastesch argumentéiert, fir him ze erkläeren, firwat nëmmen een dat ka sinn, an net gespuert mat destruktiven Urteeler iwwert deen aneren. Ech wousst jo, datt dat ënner véier Ae geschitt an datt een do kann eng Schëpp nogeheie fir de Vis-à-Vis ze beandrocken. Engem Friemen hätt ech gesot, wéi ech déi Saach gesinn … awer ouni vill Negatives iwwert meng zweet Wiel ze verbreeden. An et wär mer ni agefall, eng Zeitungsannonce ze bezuelen, fir datt d’Welt gewuer gëtt, wéi ech dat gesinn. Am Internet-Zäitalter gëtt et déi Ënnerdeelung net méi: D’Goat-Diskussioun spléckt d’Fussballwelt an zwee Lager an esouguer Leit, déi mat deem Sport näischt ze dinn hunn, hunn eng Meenung. A vertriede se, wéi wann nëmmen d’Verdäiwelung an den Haass vun deem engen, deen aneren an der schéinster Luucht géing schénge loossen.

Is this your new site? Log in to activate admin features and dismiss this message
Log In